Die aktuelle Kabarett-Kolumne von „Fälscher" Woife Berger.
ROTTAL-INN Des is scho komisch, wos Oan do so eifoid, wenn ma an seine Kindheit denkt, bsunders so weihnachtliche Erinnerungen. I woaß nu, wia i owei wahnsinnige Angst vorm Nikolaus ghobt hob, weil`s ghoassn hod „der Krampus, der nimmt di mit im Sock“. Dann war i oba total verwirrt, wia vor mir a Nikolaus gstanden is, organisiert durch de vo da örtlichen Männerkongregation, total bsuffa, da Bart voller Essensreste oder vielleicht wars a a Breckalhuastn.
De Mitra verkehrt auf und voller Inbrunst lallend sogt er sei Sprichal auf: „von drrrausst vom Wahhlde komm ich heeeer….“. Leider hod er dabei de Texte, de meine Eltern gschriebn ham verwechselt. Zwar hod er mein Nam gsogt, oba dazua den Text vo meiner kloana Schwester obagleiert. Do hob i mit meine 11 Johr sche gschaut, wia mia vom Nikolaus naheglegt worn is, dass i nimma ins Bett bieseln derf und dass i erm meinen Diddi mitgebn soid. Guad, des war mia eh wurscht, weil… erstens hob i nimma an den Nikolaus glaubt und zwoatens is es mia eigentlich nur nu um de Geschenke ganga. Des war domois a de Zeit, wo es ein niederbayerisch, sportliches Ziel war, den Nikolaus so bsuffa zum mocha, dass er nimma wirklich fahrtüchtig war…oba des hod domois nu nermt interessiert.
De Mama sogt: „Woifgang hoi de Geschenke eina fia eich, de stengan in da Garasch“. Beim Einatrogn steht dann da Nikolaus immer nu im Hausgang, mit a Hoibe Bier in de Bratzn. Mia Kinder ham uns bloß gwundert, weil der bis Mitternocht in unserm Hausgang gsuffa und gröhlt hod. Auf de Frage vo meim Bruada „warum is denn da Nikolaus owei nu do?... i kann ned schloffa“, hob i grod gmoant „hoffentlich fohrt er ned seyba“. Wia i dann in dem Oita war, dass i ois Nikolaus unterwegs war, warn mia vo da Landjugend genau a so wia unsere Vorgänger, guad angspitzt und natirle a nu seyba gfohrn. Do muass i scho sogn „Hut ab vor da heitigen Jugend!“ Wos i do von meinem Siefsohn mitkriag, san de um einiges vernünftiger wia mia domois. Wer fohrt, sauft nix. Super! Bis nächste Woch, bleibts boarisch, eier Fälscher – Woife Berger
Rottal-Inn